zwoastoazwoastoa

zwoa zu fümft

leitkultur

es is so schee wenn ma an großen bruadern hod
mit am broaden kreuz und mit geld
der hinter dir steht der auf di aufpasst
deine feinde ins gfrieß einihaut
der oiwei do is der immer recht hod
weil der stärkere schafft o
nur deine freind die konnst da selbst aussuacha
nur dei bruader is hoid einfach do

JA SO EIN GLÜCK daß ma die amis hom
die verteidigen unser freiheit
vor schurken die die welt bedrohen
unsere ehrenwerte zivilisation
EIN GLÜCK daß ma dieamis hom
die uns vorschreibm wen ma zu mögn
und zum hassen hobm uns erklären
welcher schaden sinnvoll is
und welcher nur kollateral

sie bauen uns waffen fürn frieden
mauern die die freiheit bewahren
daß ja koa schurke von do drüben
unsere kulturellen werte bedroht
in unseren städten herrscht no frieden
mit gummiknüppel knallhart bewacht
uniformiert und anonym
passen s auf daß koaner s mei z weit aufmacht

JA ZUM GLÜCK homma die polizei
die verteidigt unser freiheit
vor chaoten die die ordnung bedrohen
in unserer ehrenwerten zivilisation
ZUM GLÜCK homma die polizei
die aufpasst daß es geld do wo s is a bleibt
a betrüger kimmt erst ab ner million aufwärts
straffrei davon

mir wohnan schick in ruah vui rasen zum oschaun dazua
für die kinder verboten zwegns am gschroa
d hauptstrass danebm is doch eh scho laut gnua
in da fruah pflegt der rasenmäher die natur
da hausmeister passt auf daß koa hund ned scheisst drauf oder wer bleamen zwickt oder knickt
oder gar unbefugt sein scheena rasen betritt

JA ZUM GLÜCK is der hausmeister do
der verteidigt unser freiheit
stellt unser rasenkultur mit verbotsschuideln zua
damit si ja koaner mehr do dro gfreit
EIN GLÜCK daß ma die freiheit hom
die uns vorschreibt wos ma zum doa und zu lassen hom
a fuaßgänger wead auf da strass überfahrn
tja er sollt hoid ned die freiheit der autofahrer stören

ich rase oiso bin ich
und ich lärme na und dann stink ich
aber ein porsche will artgerecht ghoiden wean
do deamma weider fleißig pflastern und teern
die oiden leit deamma nach und nach in heime sperrn
do deafas dann leise und würdevoll sterbn
die penner von da strass
die junkies im knast
hauptsach sie dean neamand anders mehr stören

JA SO EIN GLÜCK daß ma die amis hom …

A SO A GLÜCK daß ma de olle hom
die dafür sorgen daß unser freiheit unantastbar bleibt

obgführt in handschelln eigsperrt deckel drauf und zua

© Ludwig Wiedenmann

Share it:                          

Skip to top 

Copyright © 2006 - 2021 zwoastoa