zwoastoazwoastoa

a jeda is a sepp

da hanswurscht

anno domois is es passiert
in einer lauen sommernacht
hom zwoa sich liebende bussiert
da gummi is g´riss´n
des kunntn´s ja ned wiss´n
neun monate später
hod er´s erste moi g´schiss´n

se woid´n eahm ja eigentlich ned hom
ois sie´s dann g´merkt hod
war´s z´spat
hod si ned traut wos zum sog´n
und so isses dann
schließlich so weit kemma
am letzten drücker
mußt´s in´s krankenhaus renna

des war sei erster dog
koana hod eahm g´frogt
wo er do reingeraten is
des hod eahm koana g´sogt
wann´s am vodda
in da arbad hom oan überbrod´n
und er is hoamkemma
hod´s da bua deafa ausbod´n
d´mamma hod si ned traut
zu widersprechen
ihr´n frust hod´s runterg´soffen bis zum erbrechen
na is er vor´m fernseher g´sessen
und hod die ganze scheiße
in sich einig´fressen

da hanswurscht
der war olle wurscht …
da hanswurscht
weil da hans
war eahna olle a so wurscht….
an ganzen tog
is er g´sessen in seim zimmer
aus angst vor´m vodda
is er kaum mehr aussekemma
in da schui war er brav
weil er war oiwei so stad
hod nia an blädsinn g´macht freind hod er koane g´habt
a brille auf da nos´n
a spange in da fress´n
sei wamp´m is g´wachsen
vom fernseh´n und essen
alloa is er im pausenhof g´sessen
von kloa auf is a für olle
nur da prügelknabe g´wesen

si hom eahm tratzd
und g´striezelt
da vodda hod eahm g´stiefelt
mit zwölfe
hod er no in´d hos´n einipieselt
sei kindheit war für eahm
nur a oanzige straf
und koana hod wos g´merkt
weil er war ja immer brav
na war sei schulzeit endlich vorbei
und ois wos er g´lernt hod
war wia ma schmerzen ertrogt

da hanswurscht
der war olle wurscht
da hanswurscht …

hanswurscht hom´s g´sogt zu eahm do huift koa jammern und koa plärrn
se wean a nie oan akzeptiern
wann er ned g´lernt hod sich zu wehr´n
hanswurscht hom´s g´sogt zu eahm do huift koa jammern und koa plärrn
se wean a nie oan akzeptiern wann er ned g´lernt hod so wia sie zum wean
und heit stengan´s olle ratlos do ma kon sie ned erklär´n
wia kunnt´s nur so weit kemma es hatten eahm doch olle gern … sogn´s …
de nachbarn kenna´s ned versteh er is oiwei so höflich g´wen
und koana woaß
wia kunnt des nur passiern
sie war so jung und oiwei fröhlich
sie war so schee und no so zierlich
sie lag zerhackt im bluat
neben ihr saß nachbars bua . . . !

die richter war´n ergriffen
die psychologen wissen
„in manchen menschen
steckt das böse einfach drin“
in da bild is er a monster g´wen
in der talkshow deans´d
todesstrafe diskutier´n
nur an hans duat des längst
nimmer berühr´n

hanswurscht hom´s g´sogt zu eahm do huift koa jammern und koa plärrn
se wean a nie oan akzeptiern
wann er ned g´lernt hod sich zu wehr´n
hanswurscht hom´s g´sogt zu eahm do huift koa jammern und koa plärrn
se wean a nie oan akzeptiern wann er ned g´lernt hod so wia sie zum wean

hanswurscht hom´s g´sogt zu eahm und er kunnt´s hoid einfach nimmer hean
bis am hans jetz olles wurscht war
es soi nur koana mehr lacha über eahm

© Ludwig Wiedenmann

Share it:                          

Skip to top 

Copyright © 2006 - 2021 zwoastoa